Sığorta
207

Azərbaycanda dövlət dəstəyi ilə ilk aqrar sığorta müqaviləsi imzalanıb

Azərbaycanda dövlət dəstəyi ilə ilk aqrar sığorta müqaviləsi imzalanıb

Bu gündən Azərbaycanda dövlət dəstəyi ilə aqrar sığorta mexanizmi rəsmən fəaliyyətə başlayıb. Belə ki, cəbhə bölgəsi olan Tərtər rayonunda ilk aqrar sığorta müqaviləsi imzalanıb.

“Renkinq” bu barədə Kənd Təsərrüfatı Nazirliyinə istinadən xəbər verir.

Məlumata görə, rayonun Bəyimsarov kəndində baş tutan imzalanma mərasimində nazirliyin nümayəndələri, Bakıda səfərdə olan Türkiyənin kənd təsərrüfatı sığortaları təşkilatının (TARSİM) rəhbərliyi, nazirlik yanında Aqrar Sığorta Fondunun (Fond), “Aqrar Sığorta Müştərək Sığorta Şirkəti” ASC-nin rəhbərliyi, fermer və sahibkarlar iştirak edib.

İlk aqrar sığorta müqaviləsi əsasında Tərtər rayonundan olan sahibkarın südlük heyvanları sığortalanıb. Fond və fermer Habil İbrahimli arasında imzalanmış müqavilədə 50 baş iribuynuzlu heyvanın aktual risklərdən sığortalanması nəzərdə tutulur. Tədbirdə çıxış edən Fondun İdarə Heyətinin sədri Fuad Sadıqov bildirib ki, Azərbaycanda dövlət dəstəyi ilə aqrar sığorta mexanizminin yaradılması Prezident İlham Əliyevin rəhbərliyi ilə aqrar sektorda həyata keçirilən ardıcıl islahatlar və fermerlərə dövlət dəstəyinin növbəti mərhələsidir.

“Aqrar sığorta fermerlərin məhsullarını və gəlirlərini qorumaqla onlara dəstək olacaq. Qaydalara görə, aqrar sığorta haqqının 50%-i dövlət tərəfindən ödəniləcək. Nəticədə kənd təsərrüfatı daha təhlükəsiz biznes sektoruna çevriləcək və bu sahəyə yatırımlar daha da artacaq”, - deyə F.Sadıqov bildirib.

Onun sözlərinə görə, ilk aqrar sığorta müqaviləsinin Ermənistan tərəfinin davamlı atəşə tutduğu ərazidə – Tərtər rayonunda imzalanması təsadüfi deyil: “Dövlət bununla nümayiş etdirir ki, ölkənin bütün ərazilərində, xüsusilə də cəbhə və cəbhəyanı ərazilərdə fəaliyyət göstərən fermer və sahibkarların yanındadır və onları daha güclü şəkildə dəstəkləməkdə davam edir”.

İmzalanma mərasimində iştirak edən TARSİM-in Himayəçilik Şurasının üzvü, Türkiyənin Kənd Təsərrüfatı və Meşəçilik nazirliyinin nümayəndəsi Bekir Engürülü bildirib ki, aqrar sığorta fermerlərin risklərini sığortalamaqla aqrar sahənin maliyyəyə çıxışını asanlaşdıracaq, kənd təsərrüfatının daha dayanıqlı inkişafına şərait yaradacaq.

Fermer H.İbrahimli isə bildirib ki, aqrar sığorta fermerlərin işini asanlaşdırır və təsərrüfatı daha da genişləndirməyə şərait yaradır. O yeni sığorta mexanizminin işə düşməsi, xüsusilə də cəbhə bölgəsindən fəaliyyətə başlamasına görə ölkə rəhbərliyinə minnətdarlığını bildirib.

Yeni işə düşən aqrar sığorta sistemində dövlətin sahibkarlara ciddi dəstəyi nəzərdə tutulub. Belə ki, sığorta haqqının 50%-i dövlət tərəfindən ödəniləcək, qalan məbləği isə fermer hissələrlə ödəyə biləcək. Sığorta risklərinin qiymətləndirilməsi və sığorta hadisələrinin araşdırılması üçün müstəqil sığorta eksperti xidmətinin fəaliyyətini də dövlət maliyyələşdirəcək.

Fond ilkin mərhələdə 1-7 yaşlı südlük inək və camışları, 14 bitki növünü (buğda, arpa, qarğıdalı, kartof, şəkər çuğunduru, portağal, limon, narıngi, çay, çəltik, tütün, üzüm, fındıq, pambıq), eləcə də nohur və hovuzlarda yetişdirilən balıqları sığortalayacaq. Gələcəkdə aqrar sığortanın əhatə etdiyi sığorta predmetləri və risklərin siyahısı genişləndiriləcək. Aqrar sığorta çərçivəsində sığortalılarla müqavilələrin bağlanması, hadisə ilə bağlı müraciətlərinin qəbul edilməsi və hadisələrin tənzimlənməsini isə “Aqrar Sığorta Müştərək Sığorta Şirkəti” həyata keçirəcək. Fermerlər və sahibkarlar şirkətin təsisçiləri olan – “PAŞA Sığorta”, “Qala Sığorta”, “Meqa Sığorta”, “Azərbaycan Sənaye Sığorta”, “Xalq Sığorta”, “Azsığorta” və “Bakı Sığorta” ASC-lərə müraciət etməklə əkin sahələrini, kənd təsərrüfatı heyvanlarını və akvakultura məhsullarını sığortalaya biləcəklər.

Bölmədən olan bütün xəbərlər