Bankçılıq
93

Azərbaycan Mərkəzi Bankı Avropa Yenidənqurma və İnkişaf Bankı ilə svop müqaviləsi bağlayıb

Azərbaycan Mərkəzi Bankı Avropa Yenidənqurma və İnkişaf Bankı ilə svop müqaviləsi bağlayıb

Azərbaycan Mərkəzi Bankı (AMB) pandemiya şəraitində biznes və əhaliyə dəstəyin göstərilməsi istiqamətində kompleks tədbirlərini davam etdirir.

“Renkinq” xəbər verir ki, bu barədə AMB-nin açıqlamasında bildirilir.

Məlumatda həmçinin deyilir ki, bu istiqamətdə mühüm yeniliklərdən biri də AMB-nin beynəlxalq maliyyə təşkilatları ilə əməkdaşlığı çərçivəsində iqtisadiyyatın maliyyə xidmətlərinə çıxışını daha da artırmaq üçün yeni maliyyə alətlərinin tətbiqidir. Bu məqsədlə koronavirus pandemiyası dövründə real sektorun maliyyə resurslarına çıxış imkanının artırılması məqsədilə AMB Avropa Yenidənqurma və İnkişaf Bankı (AYİB) ilə ümumi məbləği 200 milyon ABŞ dolları olan svop müqaviləsi bağlayıb. Bununla da AYİB yerli valyutaya etibarlı çıxış imkanı əldə etməklə yerli şirkətlərə milli valyutada kredit dəstəyi göstərməyə yeni imkanlar əldə edəcək. Bu məbləğin 50 milyon ABŞ dolları, yəni 85 milyon manat ekvivalentinin cari ildə müvəqqəti çətinliklərlə üzləşən yerli şirkətlərə, xüsusilə də nisbətən kiçik şirkətlərə verilməsi nəzərdə tutulur.

AMB və AYİB arasında əldə edilmiş bu razılaşma pandemiyadan təsirlənmiş biznes subyektlərinin dəstəklənməsi ilə yanaşı, ölkəmizdə törəmə maliyyə alətlərindən istifadənin genişləndirilməsini və alternativ maliyyələşmə aləti kimi istifadəsini də təşviq edəcək. Bu, AMB-nin beynəlxalq müstəvidə həyata keçirdiyi strategiyanın, beynəlxalq maliyyə təşkilatları ilə olan sıx əməkdaşlığın və törəmə maliyyə alətləri üzrə beynəlxalq çərçivə razılaşmasının ölkəmizin pul və kapital bazarında tətbiqi nəticəsində əldə olunmuş nailiyyətdir. Eyni zamanda, Azərbaycan kapital bazarının inkişaf etdirilməsi istiqamətində AMB ilə AYİB arasında yerli bazarda manatda istiqraz emissiyasının həyata keçirilməsi və törəmə maliyyə alətləri bazarının hüquqi çərçivəsinin beynəlxalq standartlara uyğunlaşdırılması üzrə əməkdaşlıq davam etdirilir.

Xatırladaq ki, AYİB Azərbaycan ilə uzunmüddətli səmərəli əməkdaşlıq həyata keçirir. Bank bu günə qədər Azərbaycan iqtisadiyyatına 170 layihə üzrə 3,3 milyard avro vəsait investisiya edib. Qurum həmçinin, kiçik və orta sahibkarlıq subyektlərinə biznes məsləhət xidmətləri göstərir, 1 000-dən çox şirkətin maliyyə nəticələrinin və inkişafının təkmilləşdirilməsinə texniki dəstək verib.

Bölmədən olan bütün xəbərlər