Büdcə
220

Azərbaycanda 50-yə yaxın şəxsin əmək müqaviləsi olmadan işlədiyi üzə çıxıb

Azərbaycanda 50-yə yaxın şəxsin əmək müqaviləsi olmadan işlədiyi üzə çıxıb

Vergilər Nazirliyinin həyata keçirdiyi nəzarət tədbirləri nəticəsində Sumqayıt şəhərindəki “Ən Ucuz Market”lər şəbəkəsinə daxil olan 7 obyektdə 33 nəfərin əmək müqaviləsi olmadan işlədiyi aşkar edilib. 

"Renkinq" xəbər verir ki, bu barədə nazirliyin açıqlamasında bildirilir. 

Məlumatda həmçinin deyilir ki, həmin obyektlərin hər birində əhali ilə pul hesablaşmalarının aparılması qaydalarının pozulduğu və faktiki göstəricilərin vergi orqanlarına təqdim edilmiş uçot sənədlərində bəyan edilən göstəricilərlə müqayisədə yüksək olduğu üzə çıxıb.

Bakının Sabunçu rayonunun Bakıxanov qəsəbəsindəki Cəlilov Elşən Firdovsi oğluna məxsus tikiş sexində aparılan vergi nəzarəti tədbirləri zamanı isə 16 nəfərin əmək müqaviləsi hüquqi qüvvəyə minmədən işlədiyi aşkar edilib. Həmçinin müəyyən edilib ki, vergidən yayınmaq məqsədilə vergi ödəyicisi fəaliyyət göstərdiyi obyekti vergi orqanlarında qeydiyyatdan keçirməyib. 

İşə cəlb edilmiş fiziki şəxslərin sayı 10 nəfərdən çox olduğu halda, cinayət tərkibi yaranır.

"Vergilər Nazirliyi bildirir ki, işəgötürənlər işçilərin əmək müqaviləsi əsasında işə cəlb olunması ilə bağlı qanunvericiliyin tələblərinə əməl etməli, habelə mal və pul vəsaitlərinin uçotdan gizlədilməsi hallarına yol verməməlidirlər. Vergi orqanları dövriyyələrini gizlədərək vergidən yayınan şəxslərin aşkar edilməsi məqsədilə vergi nəzarəti tədbirlərini davam etdirir və bir daha xəbərdarlıq edir ki, qanun pozuntularına yol verilməsi və vergidən yaynma hallarının qarşısı gələcəkdə də qətiyyətlə alınacaq, intizamsız vergi ödəyicilərinə qarşı qanunvericilikdə nəzərdə tutulmuş tədbirlər görüləcək.

Nazirlik vətəndaşların nəzərinə bir daha çatdırır ki, əmək müqaviləsinin bağlanması, ilk növbədə, işçilərin sosial maraqlarının təmin olunmasına yönəldilib. İşçilər əmək müqaviləsi olmadan və yaxud işəgötürənlərin onlara ödədiyi qeyri-leqal əmək haqları ilə razılaşmaqla özlərini gələcəkdə dövlətin sosial təminatından məhrum etmiş olurlar. Əmək müqaviləsi olmayan və əməkhaqqını qeyri-leqal alan işçilər məzuniyyət haqqının, xəstəlik və işdənçıxma müavinətinin ödənilməməsi ilə rastlaşır və ən əsası, gələcəkdə pensiya təminatından məhrum olurlar. İşəgötürənlə əmək müqaviləsi bağlamaqla və yalınız rəsmi əməkhaqqı ödəməyi tələb etməklə hər bir işçi öz gələcəyini indidən düşünmüş olur”, - qurum bəyan edib. 

Bölmədən olan bütün xəbərlər