Digər
223

Vüqar Bayramov: “Azərbaycan Mərkəzi Bankı dolların təklifini aylar üzrə optimallaşdırmağa çalışmalıdır”

Vüqar Bayramov: “Azərbaycan Mərkəzi Bankı dolların təklifini aylar üzrə optimallaşdırmağa çalışmalıdır”

“Gürcüstanda artıq 1 dollar almaq üçün 2,87 lari ödəmək lazımdır. Halbuki, 1 il əvvəl paytaxt Tbilisidə 1 dollar 2,4 lariyə dəyişdirilirdi. Bu da o deməkdir ki, il ərzində gürcü larisi 17% dəyər itirib”.

“Renkinq” xəbər verir ki, bunu iqtisadçı-ekspert Vüqar Bayramov bildirib.

“Gürcüstana ildə 1,5 milyon turistin getdiyi Rusiyanın gürcü mallarının idxalını əngəlləcəyi təhlükəsi lariyə təzyiqi artırır. İki ölkə arasında gərginliyin artacağı halda larinin daha da ucuzlaşacağı istisna olunmur.

Gürcüstan Azərbaycanın qeyri-neft ixracatında ilk 3-lüyə daxil ola bilməsə də, ən çox neft olmayan məhsullarımızı göndərdiyimiz 4-cü ölkədir. Azərbaycan 2018-ci ildə qonşu ölkəyə 124,5 milyon dollarlıq qeyri-neft məhsulu ixrac edib. B,u 3-cü ən çox qeyri-neft məhsulu göndərdiyimiz İsveçrədən cəmi 11 milyon dollarlıq az ixrac deməkdir. Gürcüstanla illik ticarət dövriyyəimiz isə ötən il əvvəlki illə müqayisədə 5% artaraq 579 milyon dollara çatıb. Tranzit əməkdaşlığı da bura əlavə etsək əminliklə qeyd etmək olar ki, Gürcüstan Azərbaycan üçün vacib iqtisadi tərəfdaşlardandır.

Larinin ucuzlaşması manata psixoloji təsir etməkdədir. Artıq bir sıra valyuta dəyişmə məntəqələrində dolların alış kursu çox cüzi olsa da bahalaşıb. Bir sıra banklarda 1 dolları 1,7007 manata təklif edilir. Doğrudur, neftin qiyməti Azərbaycan Mərkəzi Bankı (AMB) üçün məqbul səviyyədədir. Artıq neftin 1 bareli 67 dollardan baha satılır. Bununla belə, qonşu ölkələrin milli valyutalarının ucuzlaşması bizim valyuta bazarımıza təsirsiz ötüşmür. Amma yenə də AMB-nin mövqeyi həlledicidir. Güman olunur ki, manatın məzənnəsinin necə dəyişməsi birbaşa baş bankın mövqeyindən asılı olacaq. Bununla yanaşı, bu ilin avqust və dekabr aylarında dollara tələbin yenidən artacağı gözlənilir. Belə ki, avqustun ikinci yarısı və sentyabrın əvvəli idxal olunan məktəb ləvazimatlarına tələb artıdığına görə dollar alışı yüksəlir. İlin sonunda da idxal və xarici turist səfərlərinin sayı artır. Dövlət və özəl müəssisələrin xarici borc öhdəlikləri var və bu da dollara tələbi artır. O baxımdan, biz yenidən ilin sonunda dollara tələbin artacağını proqnozlaşdırırıq. Bu baxımdan, AMB dollar təklifini aylar üzrə optimallaşdırmağa çalışmalıdır”, - deyə o, qeyd edib.

Bölmədən olan bütün xəbərlər