Azərbaycanda fəaliyyət göstərən 20 sığorta şirkəti ötən ili 74,4 milyon manat xalis mənfəətlə başa vurub ki, bu da onların bu il yanvarın 1-nə malik olduqları 1 455,8 milyon manat məbləğində aktivlərin 5,1%-i qədərdir.

Bu, “Renkinq”in apardığı araşdırma nəticəsində məlum olub.

Ayrı-ayrı sığorta şirkətlərində isə sözügedən nisbət fərqlidir. Belə ki, 2022-ci ildən mənfəətlə çıxmış 13 sığorta şirkəti arasında aktivlərindən ən yaxşı istifadə edəni "Qala Həyat Sığorta" ASC olub. Bu şirkətin əldə etdiyi mənfəət aktivlərinin 18,1%-ni təşkil edib. Baxmayaraq ki, "Qala Həyat Sığorta" aktivlərinin məbləğinə görə ölkədə 8-cidir.

Fəaliyyət effektivliyinə görə, 2-ci yeri isə “Qala Sığorta” ASC tutub. Bu şirkət ötən il aktivlərinin 16,7%-i qədər mənfəət əldə edib. Bu arada, "Qala Sığorta" aktivlərinin məbləğinə görə, 20 sığorta şirkəti arasında 5-ci yerdə qərarlaşıb.

3-cü yerə isə “Atəşgah Həyat Sığorta" ASC sahib çıxıb. Bu şirkətin illik mənfəəti aktivlərinin 10,7%-i qədər olub. Halbuki, "Atəşgah Həyat Sığorta" aktivlərinin məbləğinə görə, sığorta şirkətləri arasında 4-cüdür.

Mənfəətlə işləyən qalan 10 sığorta şirkətindən isə 1-də sözügedən göstərici 10,6%, 7 şirkətdə 1-10% arasında, 2 şirkətdə isə 0-1% arasında dəyişir.